13/12/2008
يوميات باحث مصري : قرار الدراسة ( انا متفائل جداااااااااااااااااا)
Posted on 11:27 ص by helm
كان حسن وهو ابن الخال الاصغر ليوسف , ذا السنتين من عمره , طفل في غاية اللطف والجمال , رقيق جدا . علي الرغم من الجروح الخفيفة في وجهه من اثر الشجار مع اخوته , يعني فتحتين , كل واحدة 8 غرز مش حاجة , ( يعني .... بتحصل في احسن العائلات ), جميل جدا وحبوب خالص , استقباله لاي ضيف بيكون حميم جدا , حتي لو ما يعرفوش , فعلي الرغم من عدم قدرته علي الكلام بعد , الا ان استخدامه لفمه لا يتوقف , سواء بالبصق علي من امامه او باخراج لسانه الطويل الجميل ( طبعا , هو بيكون قصده انه يرحب بالضيف , لكن امكانياته كطفل لا تتجاوز حدود ذلك ) .. بالاضافة الي كونه طفل في غاية النباهة .. حاضر الذهن .. مصحصح لكل ما هو مؤذي .. مرتب الافكار .. قلم واحد منه .. يجعلك تلعن اليوم اللي انت اتولدت فيه عشان تتهزا بالشكل ده من عيل مفعوص .. له القدرة علي ان يجعلك امام الناس مسخرة الجميع لو اراد ..., عليك فقط ان تنبهه لشكلك .. وهو يحطك في الميموري ,ويعملك دون لود كل يوم لحد ما تحط صورتك بالمقلوب في الفاس بوك , ده لو لسه اصلا عندك فاس توريه للناس
كان حسن من الكوادر المبشرة والمنبأة بقدوم شخصية قوية , في الشدة جامد .. وفي الاذية مفتري ومؤذي
علي كل فقد كان يوسف يضع لابن الخالة الاصغر مليون حساب , حتي بعد قراره ان يكمل دراساته العليا .. لم يطلع احد في العائلة علي هذا القرار قبل ان يطلع حسن .. اخذه في حجرته الصغيرة واجلسه امامه علي السرير .. واخذ يشرح له الموضوع من كافة ابعاده .. ويحاول ان يستجمع تعبيرات وجهه .. حتي يتعرف علي مدي قبوله لفكرة استكماله دراسته .. انتظر 10;وسف رد حسن النهائي .. فاما قبول الي الابد واما رفض الي الابد ( مغيش هزار ) . اقترب يوسف بوجهه اكثر من حسن ( ايه يا حسن , اكمل دراسة ولا ايه ؟؟ ) , و حصل علي الرد النهائي ...
بصقة
بصقة علي وجهه .
الاشتراك في:
تعليقات الرسالة (Atom)
المشاركات
No Response to "يوميات باحث مصري : قرار الدراسة ( انا متفائل جداااااااااااااااااا)"
إرسال تعليق