18/08/2008
علي باب السفارة و بوابة تفتيش ..... ( من اجمل ما كتب علي سلامة )
Posted on 2:06 ص by helm
فيديو بصوت علي سلامة ( بوابة تفتيش )اااا
بوابة تفتيش
-------------------------------
بوابة تفتيش على بابك
كل ما احَاول أعدى تزمر
وبتتشرط
وبتتأمر
أرَجَع أدَور تاني وأدور
وكل ما أعدي برضه تزمر
دب أدي الساعة
وأدي حزامي
وآدى بطاقتي
والنضارة
وآدى عنواني
وكل حَكَايَتي
وآدى أمارة
حتى الفكة الباقية في جيبي
والأشعار
والمحفظة مفيهاش غير صورتك
ليل ونهار
كل هدومي
زي ما نازل من بطن أمي
من غير حتى ورقة توت
وكل ما أفوت
البوابة برضك تزمر
ولما لمحني
واحد طَيب م الحراَس
وقَاللي اسْمَعني يا ابن اَلَناس
إرمي الحته الحلوة في قلبك
وعَدى
البَوابَة عمرهَا
ما تزمر
على باب السفاره......
-------------------------------
على باب سفارة كندا
..لمحت ابليس و ف ايده استماره
..بقول له على فين
..قاللي بص
..يا هجره يا اعاره
..يا عم زهقت كفرت
..الاقيش معاك سيجاره
..انا انتهيت خلاص
..لا نافع وسواس ولا خناس
..ولا ليا عيش وسط الناس
دي عالم مجرمين
..عندكوا فائض ف الفساد
..في كل البلاد
..ومش محتاجين شياطين
..مليش عيش ف البلد دي
....بقالي سنين عاطل
...و انتوا بتعرفوا
..تقلبوا الحق باطل
..و تسلكوا القاتل
..و تمشوا ف جنازة المقتول
..ومفيش مشاكل
..يا عم ده انا بقيت أوسوس بالمقلوب
...و أقول للحرامي كفايه بقى توب
..انت هاتعمل كل الذنوب لوحدك
...و أنا ابليس
أشتغل واعظ
..ولا كمساري ف اتوبيس
..يا عم ده انا زمان
..كنت استنى حد ينسى
يسمي
..وهو بياكل لقمته
..دلوقتي كل اكلكم ملوث
..و بصراحه الواحد خايف على صحته
...ده مفيش ضمير اساسا
..عشان اموته
..و كل واحد بمزاجه
..خربانه ذمته
...يا عم ده كل حاجه اتسرقت
..وكده الاجيال الجديده
..م الحراميه اتظلمت
..يا راجل ده من كتر ما لطشت معايا
..خرجت ف مظاهره
..مع الناس اللي بتقول كفايه
وبرده مفيش فايدة
الاشتراك في:
تعليقات الرسالة (Atom)
المشاركات
2 Response to "علي باب السفارة و بوابة تفتيش ..... ( من اجمل ما كتب علي سلامة )"
المدونه قمة فى الروعه والجمال بس ازاى مافيش حد بيزورها ولا بيعلق فيها
حاولى تشهرى مدونتك تعلقى فى مدونات كتير وتردى على التعليقات
امنى اشوف مدونتك اكبر واكبر
الى اقرب لقاء
رازى
شكرا علي الاطراء والنصيحة , ورفع المعنويات , انا سعيدة والله لان في حد علق (اخيرا حد علق ) .
إرسال تعليق